काठमाडौं । राष्ट्रिय स्वतन्त्र पार्टी (रास्वपा)ले समाचार लेखेकै आधारमा विभिन्न सञ्चारमाध्यममा कार्यरत पत्रकारहरूलाई प्रहरीले कार्यालयमै पुगेर नियन्त्रणमा लिएको तथा अन्य पत्रकारको खोजी जारी राखेको घटनाप्रति गम्भीर ध्यानाकर्षण भएको जनाएको छ।
रास्वपाले शुक्रबार विज्ञप्ति जारी गर्दै समाचार सामग्रीका विषयमा असहमति, गुनासो वा कानुनी प्रश्न उठेमा त्यसको निरूपण स्थापित कानुनी प्रक्रिया र वैधानिक निकायमार्फत हुनुपर्ने बताएको छ।
लोकतन्त्रमा सञ्चार जगत्ले नागरिकको आवाज मुखरित गर्ने महत्वपूर्ण भूमिका निर्वाह गर्ने उल्लेख गर्दै रास्वपाले कानुन कार्यान्वयनका नाममा स्वतन्त्र प्रेसलाई भयभीत बनाउने, सञ्चारगृहको गरिमामाथि प्रहार गर्ने र लोकतान्त्रिक संस्थाहरूलाई सङ्कुचित पार्ने गतिविधि स्वीकार्य नहुने जनाएको छ।
विज्ञप्तिमा प्रेस स्वतन्त्रतामाथिको प्रहार नागरिकको सुसूचित हुन पाउने मौलिक अधिकारमाथिकै कुठाराघात भएको उल्लेख छ। पत्रकारिताको विश्वव्यापी मूल्य, मान्यता र अभ्यासअनुसार समाचारको स्रोतको गोपनीयता रक्षा गर्नु सञ्चारकर्मीको अहरणीय व्यावसायिक अधिकार, दायित्व र पेसागत धर्म भएको रास्वपाको भनाइ छ।
सञ्चारमाध्यमलाई नियमन गर्ने अधिकारप्राप्त संस्थाहरू क्रियाशील रहेको अवस्थामा स्थापित कानुनी तथा संस्थागत प्रक्रियालाई छलेर सञ्चारकर्मीमाथि धरपकड गर्नु विधिको शासनको उल्लङ्घन भएको पनि रास्वपाले जनाएको छ।
समाचार लेखेकै आधारमा पत्रकारहरूलाई नियन्त्रणमा लिइएको र अन्यको खोजी भइरहेको घटनाको निष्पक्ष, पारदर्शी र यथार्थ छानबिन गरी सत्यतथ्य सार्वजनिक गर्न रास्वपाले सम्बन्धित निकायसँग माग गरेको छ। साथै, गैरकानुनी रूपमा नियन्त्रणमा लिइएका सञ्चारकर्मीलाई ससम्मान र बिनासर्त तत्काल रिहा गर्न आग्रह गरेको छ।
रास्वपाले कुनै पनि भय, त्रास र अनुचित दबाबमा नपरी सत्य, तथ्य र निष्ठाको पत्रकारिता जारी राख्न सञ्चारकर्मीलाई आह्वान गर्दै सञ्चार जगत्प्रति ऐक्यबद्धता प्रकट गरेको छ।
सञ्चारकर्मीको पेसागत मर्यादा, भौतिक तथा मनोवैज्ञानिक सुरक्षा र संविधानप्रदत्त पूर्ण प्रेस स्वतन्त्रताको रक्षाका पक्षमा आफ्नो अडान सम्झौताहीन रहने उल्लेख गर्दै रास्वपाले सञ्चारकर्मी तथा सञ्चारमाध्यमको अधिकार सुनिश्चितताका लागि आफू सदैव अग्रमोर्चामा उभिने जनाएको छ।
प्रतिक्रिया दिनुहोस्