आइसल्याण्डमा शनिवार सम्पन्न जनमत संग्रहमा त्यहाँका बहुसंख्यक नागरिकहरूले युरोपेली संघ (ईयु) को सदस्यता प्राप्तिका लागि गरिने वार्तालाई पुनः अगाडि नबढाउने पक्षमा मतदान गरेका छन् ।
आइसल्याण्डको सार्वजनिक प्रशारण संस्था आरयुभीले आईतवार सार्वजनिक गरेको अन्तिम मतपरिणामअनुसार ५२.८ प्रतिशत मतदाताले वार्ताको विपक्षमा र ४७.२ प्रतिशतले वार्ताको पक्षमा मतदान गरेका छन् ।
यस पटकको जनमत संग्रहमा ८२.५ प्रतिशत मतदान भएको छ, जुन सन् २००९ को संसदीय निर्वाचन पछिकै उच्च सहभागिता हो । सन् २००९ मा ८५.१ प्रतिशत मतदान भएको थियो । आरयुभीकाअनुसार यस पटकको मतदानमा कुल २ लाख २५ हजार ३१ मत खसेको थियो ।
आइसल्याण्डले सन् २००९ मा औपचारिक रूपमा युरोपेली संघको सदस्यताका लागि आवेदन दिएको थियो । तर सन् २०१३ मा युरोपेली संघप्रति अनुदार मानिने सरकार सत्तामा आएपछि उक्त वार्ता प्रक्रियालाई स्थगित गरिएको थियो ।
युरोपेली आयोगको दस्ताबेजअनुसार आइसल्याण्डले आफ्नो आवेदन औपचारिक रूपमा कहिल्यै फिर्ता नलिए पनि वार्ता प्रक्रिया भने लामो समयदेखि अवरुद्ध रहँदै आएको थियो ।
सदस्यता वार्तालाई निरन्तरता नदिने जनमत संग्रहको यो निर्णयसँगै अब आइसल्याण्ड र युरोपेली संघबीचको सम्बन्ध आगामी दिनमा पनि युरोपेली आर्थिक क्षेत्र र शेन्जेन संरचनामार्फत नै सञ्चालन हुने देखिएको छ ।
प्रतिक्रिया दिनुहोस्