काठमाडौं । प्रधानमन्त्री वालेन्द्र शाहले संविधानले परिकल्पना गरेको समतामूलक समाज निर्माणका लागि सुशासन, विकास, समृद्धि र सामाजिक न्यायलाई प्राथमिकतामा राखेर सरकार अघि बढिरहेको बताएका छन्।
संविधान दिवस तथा राष्ट्रिय दिवस, २०८३ का अवसरमा शनिबार आयोजित मूल समारोहलाई सम्बोधन गर्दै प्रधानमन्त्री शाहले संविधान जति राम्रो भए पनि त्यसलाई कार्यान्वयन गर्ने हात इमानदार र सक्रिय नभए संविधान कागजमा सीमित हुने बताए।
“यो सुरुवात हो, अन्त्य होइन। भ्रष्टाचार र दण्डहीनताको जरो गहिरो छ। तर त्यो जरो उखेल्ने हातहरू अब झन् बलिया छन्, झन् धेरै छन्,” उनले भने।
सरकारले सुशासन कायम गर्न प्रशासनिक संरचनाको उपयुक्त आकार निर्धारण, भ्रष्टाचारविरुद्ध शून्य सहनशीलता, प्रशासनयन्त्रमा राजनीतिक तटस्थता र सरकारी तथा सार्वजनिक पदमा योग्यतामा आधारित नियुक्ति प्रक्रिया अवलम्बन गरेको प्रधानमन्त्री शाहले बताए।
“सुशासन नारा होइन, काम हो। र हामी काम गरिरहेका छौँ,” उनले भने।
प्रधानमन्त्री शाहले संघ, प्रदेश र स्थानीय तहबीच सहकारिता, सहअस्तित्व र समन्वयका आधारमा राष्ट्र विकासको साझा उद्देश्य प्राप्त गर्न सरकार प्रतिबद्ध रहेको बताए।
उनले कृत्रिम बुद्धिमत्ता, डिजिटल प्रविधि र साइबर सुरक्षालाई सँगसँगै अघि बढाउँदै नवप्रवर्तन र स्टार्टअपलाई प्राथमिकतामा राखेर ज्ञानमा आधारित अर्थतन्त्र निर्माण गरिने बताए। डिजिटल सुशासन ब्लुप्रिन्टअनुसारको राष्ट्रिय डिजिटल पूर्वाधार निर्माणलाई त्यसको आधारका रूपमा अघि बढाइने उनको भनाइ छ।
“युवाले सडकमा मागेको सुशासन हामी प्रविधिबाट पनि सुनिश्चित गर्छौँ,” प्रधानमन्त्री शाहले भने।
रसुवा–भोटेकोशी बाढीबाट भएको क्षतिलाई स्मरण गर्दै प्रधानमन्त्रीले विपद् जोखिम न्यूनीकरण, पूर्वतयारी र प्रतिकार्यलाई सरकारले उच्च प्राथमिकतामा राख्ने बताए। नेपाल उच्च विपद् जोखिममा रहेको उल्लेख गर्दै उनले विपद् आइसकेपछि मात्र नभई त्यसअघि नै जोखिमसँग जुध्ने नीति आवश्यक रहेको बताए।
विपद्को पूर्वसूचना प्रणालीलाई सर्वोच्च प्राथमिकताका साथ कार्यान्वयनमा ल्याइने प्रधानमन्त्री शाहले घोषणा गरे।
उनले रसुवा–भोटेकोशी बाढीको उद्धार तथा राहतमा सहयोग गर्ने मित्रराष्ट्र, अन्तर्राष्ट्रिय समुदाय, संघसंस्था, निजी क्षेत्र, राष्ट्रसेवक कर्मचारी र आम नागरिकप्रति धन्यवाद व्यक्त गरे।
प्रधानमन्त्री शाहले राजनीतिक व्यवस्था परिवर्तन तथा सुशासनका लागि भएका आन्दोलनमा ज्यान गुमाउने शहीदप्रति श्रद्धाञ्जली अर्पण गर्दै रसुवा–भोटेकोशी बाढीमा मृत्यु भएका स्वदेशी तथा विदेशी नागरिकप्रति पनि श्रद्धाञ्जली व्यक्त गरे।
“संविधान जारी भएको दिन हरेक वर्ष आउँछ। तर संविधान पूरा हुने दिन हामीले आफैँ ल्याउनुपर्छ—हरेक इमानदार निर्णयबाट, हरेक पारदर्शी नियुक्तिबाट, नागरिकको घरदैलोमा पुग्ने हरेक सेवाबाट,” उनले भने।
उनले जनताले सुशासन, विकास, समृद्धि र सामाजिक न्याय मागेको भन्दै सरकारका हरेक कदम त्यही आकांक्षातर्फ केन्द्रित रहने बताए।
“शहीदहरूको रगतले लेखेको संविधान, हामी कामले पूरा गर्छौँ,” प्रधानमन्त्री शाहले भने।
प्रतिक्रिया दिनुहोस्