श्रमिकहरुलाई अमर्यादित व्यवहार नगर्न गृहमन्त्री लामिछानेको निर्देशन


काठमाडौं । उपप्रधान एवम् गृहमन्त्री रवि लामिछानेले अध्यागमन विभागका कर्मचारीहरूलाई श्रमिकहरुलाई अमर्यादित व्यवहार नर्गन निर्देशन दिएका छन् ।

मंगलबार कालिकास्थान स्थित अध्यागमन विभाग पुगरे गृहमन्त्री लामिछानेले रेमिट्यान्स पठाएर देशको अर्थतन्त्र धानिदिने श्रमिकहरूलाई अभद्र व्यवहार नगर्न निर्देशन दिँदै विगतका गल्ती नदोहोर्‍याउन आग्रह गरेका छन्।

‘गृहमन्त्री लामिछानेले भने ‘रेमिट्यान्स पठाएर देशको अर्थतन्त्रमा योगदान दिने श्रमिकलाई विमानस्थलमा जाँदा–आउँदा गरिने अमर्यादित र अभद्र व्यवहार नगर्न तथा अनावश्यक दुःख, कष्ट र हैरानी दिने प्रवृत्ति तत्काल सुधार्नुस्, ‘सहानुभूतिसहित सकारात्मक व्यवहार गरी आजैबाट सेवाग्राहीलाई परिवर्तनको अनुभूति गराउनुस्।’

लामिछानेले विदेशीका लागि अध्यायमन देशको मुहार रहेको बताउँदै गृहमन्त्री लामिछानेले मुहार नराम्रो हुँदा देशप्रति नै सकारात्मक धारणा नबन्ने हुँदा ख्याल गर्न आग्रह गरे ।

‘अध्यागमनलाई अन्तर्राष्ट्रिय मापदण्डको बनाउनु आवश्यक छ’, उनले भने ‘अध्यागमन सुधारका योजना ल्याउनुस्। तपाईंका योजनामा मन्त्रालयले सक्दो सहयोग गर्छ। म निर्देशन होइन सहकार्यमा विश्वास गर्छु, अध्यागमनलाई अन्तर्राष्ट्रिय मापदण्डअनुसार प्रविधिमैत्री बनाउनु पर्छ’

उनले विगतमा भएका घटनामा आफूले कसैलाई दोष नदिने बताउँदै अब त्यस्ता गल्ती दोहोरिन नहुने उल्लेख गरे।