पोखरामा आउँदाे चैत्र १४ गतेदेखि हुने ‘वाडा अटो शो २०२५’ काे बुकिङ आजदेखि खुला

काठमाडाैँ । पोखराको प्रदर्शनी केन्द्रमा यही आउँदो चैत्र १४ देखि १७ गतेसम्म ‘नाडा प्रिजेण्ट्स वाडा अटो शो २०२५’ आयोजना हुने भएको छ। यसका लागि पश्चिमाञ्चल अटोमोबाइल डिलर्स एशोसिएसन (वाडा) ले आजदेखि बुकिङ खुला गरेको छ।

यसअघि,गत पौष २० गते काठमाडाैँमा नेपाल अटोमोबाइल डिलर्स एशोसिएसन (नाडा) ले वाडाका पदाधिकारी तथा सदस्यहरूबिच अन्तरक्रिया कार्यक्रम आयोजना गर्दै पहिलो पटक पोखरामा अटो शो गर्ने घोषणा गरेको थियो।

प्रदर्शनीमा २ पाङ्ग्रे, ३ पाङ्ग्रे, ४ पाङ्ग्रे, लाइट कमर्शियल, हेभी कमर्शियल तथा मेसिनरी उपकरण, वित्तीय संस्था, इन्स्योरेन्स, अटो कम्पोनेन्ट्स तथा ग्यारेज उपकरणसम्बन्धी व्यवसायहरूको सहभागीता रहनेछ। ती समूहअनुसार छुट्टै दर्ता प्रक्रिया मिलाइने व्यवस्था गरिएको छ।

वाडाका अध्यक्ष दीपेन्द्र कोइरालाका अनुसार सवारी साधन क्षेत्रले अर्थतन्त्रमा राजस्व संकलन र रोजगारी सिर्जनामा महत्वपूर्ण योगदान दिँदै आएको छ। उनले अटो शोले व्यवसायी, उद्योगी, कर्मचारी तथा उपभोक्ताहरूलाई नवीनतम प्रविधिसँग जोड्ने अवसर प्रदान गर्ने विश्वास व्यक्त गरे।

नाडाले सम्भाव्यता अध्ययन गर्दै प्रदेश एशोसिएसनहरूमार्फत नेपालका अन्य मुख्य सहरहरूमा पनि अटो प्रदर्शनी आयोजना गर्ने योजना अघि बढाएको छ।