काठमाडौँ । कप्तान रोहित पौडेलको अविजित शतक मद्दतमा नेपाली राष्ट्रिय क्रिकेट टोलीले साउथ अस्ट्रेलियाविरुद्धको अभ्यास वान डे खेल जितेको छ ।
शनिबार भएको खेलमा साउथ अस्ट्रेलियाले दिएको २४३ रनको लक्ष्य नेपालले ४४.१ ओभरमा ८ विकेट गुमाउँदै भेट्टाएको हो ।नेपालका लागि कप्तान रोहित पौडेलले १०१ अविजित रन प्रहार गरे ।
१६१ रनमै ८ विकेट गुमाएको संकटपूर्ण अवस्थामा उनले सोमपाल कामीसँग अर्धशतकीय साझेदारी गर्दै टोलीलाई जितसम्म पुर्याए । सोमपाल ४० रनमा अविजित रहे ।
यसअघि टस हारेर पहिले ब्याटिङको निम्तो पाएको साउथ अस्ट्रेलियाको टोली निर्धारित ४५ ओभरमा २४२ रनमै अलआउट भएको थियो । टोलीका लागि ह्यारी मानेन्तीले सर्वाधिक ६३ रन जोडे भने दुवित हूगानबोजमले ५३ रन, रायन किङले ३५ रन र म्याकेन्जी हार्भेले २४ रनको योगदान गरे ।
नेपालका बलरहरू उत्कृष्ट रहे । नन्दन यादव र सोमपाल कामीले समान ३-३ विकेट लिए भने सन्दीप लामिछाने, शाहब आलम र रुपेश सिंहले १-१ विकेट झारे ।
यसअघि टप एन्ड टी-२० सिरिज समाप्त भएपछि नेपालले अभ्यास खेलका क्रममा अस्ट्रेलियन क्यापिटल टेरिटोरीलाई पराजित गरेको थियो भने साउथ अस्ट्रेलियासँग टी-२० मा पराजित भएको थियो । टप एन्ड टी-२० सिरिजमा नेपाल ११ टोलीमध्ये आठौं स्थानमा रहको थियो ।
प्रतिक्रिया दिनुहोस्