काठमाडाैँ । नेपाल कृषि अनुसन्धान परिषद् (नार्क) ले अध्ययन बिदामा गएर निर्धारित समयमा हाजिर नभएका ११ जना कर्मचारीलाई सेवाबाट हटाउने प्रक्रिया अघि बढाएको जानकारी सार्वजनिक गरेको छ।
परिषद्ले जारी गरेकाे सूचनामा उनीहरूले अध्ययन बिदाको सर्त र कबुलियतनामा उल्लङ्घन गरी दीर्घ समयदेखि कार्यालयमा नआएको उल्लेख गरिएको छ।
परिषद्ले कर्मचारी प्रशासन विनियम, २०४९ को सम्बन्धित प्रावधानअनुसार हाजिर नुहाएका कर्मचारीलाई घरठेगानामा पत्राचार गर्दा समेत प्रतिक्रिया नआएको र तोकिएको समयसम्म उपस्थित नहुनुले उनीहरूको आचरण नोकरी टुट्ने कसुरमाथि पर्न जाने जनाएको छ। यही आधारमा २०८१ चैत ३१ गते बसेको ६६औं बैठकको निर्णयअनुसार अध्ययन बिदामा गएको मितिदेखि नै सेवाबाट अलग गर्ने प्रकृया अघि बढाइएको परिषद्को सूचनामा उल्लेख छ।
सूचना अनुसार विभिन्न कार्यालयमा कार्यरत रहेका वैज्ञानिक तथा प्राविधिक तहका कर्मचारीहरू अच्युत मिश्र, नविन कुमार दंगाल, होमन रेग्मी, संजिव गौतम, देवराज चालिसे, प्रतिष्ठा अधिकारी, दिनेश चापा मगर, डा. सुमन कार्की, उज्ज्वल सुवेदी, अतित पराजुली र अस्मिता श्रेष्ठ अध्ययन बिदाबाट नफर्की अनुपस्थित रहेको परिषद्ले जनाएको छ।
परिषद्ले ७ दिनभित्र स्पष्टीकरणसहित उपस्थित हुन अन्तिम अवसर प्रदान गरिएको र उक्त समयसीमा नाघेपछि प्रचलित कानुनअनुसार सेवाबाट हटाएको मानिने चेतावनी दिएको छ।
प्रतिक्रिया दिनुहोस्