काठमाडौँ । नेपाली कफीको गुणस्तर सुधार, उत्पादन वृद्धि र अन्तर्राष्ट्रिय बजारमा विस्तार गर्ने उद्देश्यका साथ नेपाल कफी व्यवसायी महासंघले ‘नेपाल कफी फेस्टिभल एण्ड च्याम्पियनसिप २०८१’ को आयोजना गरेको छ। फेस्टिभल चैत २१ गतेदेखि ललितपुरको सानेपामा सुरू भएको हो जुन आज दिन हाे ।
महासंघका अध्यक्ष ओमनाथ अधिकारीका अनुसार फेस्टिभलले कफी क्षेत्रमा संलग्न उत्पादक, व्यापारी, उद्यमी र उपभोक्ताबिच समन्वय र सहकार्यको वातावरण बनाउने लक्ष्य लिएको छ। उनका अनुसार यस कार्यक्रमले नेपाली कफीको आन्तरिक र बाह्य बजार विस्तार गर्ने, कफीमा आधारित उद्यमशिलताको प्रवर्द्धन गर्ने र प्रतिस्पर्धात्मक क्षमतामा वृद्धि गर्ने प्रयास गरिरहेको छ।
“यो मेला व्यापार, ज्ञान र समन्वयको त्रिवेणी बन्नेछ। नेपाली कफी उद्योगलाई नयाँ दिशा दिन कोशेढुंगाको रूपमा स्थापित हुने विश्वास हामीले लिएका छौं,” अध्यक्ष अधिकारीले भने ।
फेस्टिभलमा कफी प्रदर्शनी, स्वाद परीक्षण, राष्ट्रिय कफी प्रतियोगिता तथा विभिन्न कफी ब्रान्ड र उद्यमीहरूद्वारा उत्पादित कफी तथा सेवाको प्रदर्शनी समावेश गरिएको छ। कफीको गुणस्तर सुधार, नवप्रविधिको प्रयोग, र युवाहरूको सहभागिता वृद्धि जस्ता विषयहरूलाई प्रोत्साहन गर्न यस्ता मेला आवश्यक रहेको रोयल हिमालय कफीका सञ्चालक मदन सापकोटाले बताए।
सापकोटाका अनुसार कफी उद्योगमा युवाको सक्रिय संलग्नताले भविष्यमा रोजगारी सिर्जनामा समेत टेवा पुग्ने विश्वास गरिएको छ।
प्रतिक्रिया दिनुहोस्