स्वास्थ्यजन्य फोहोर व्यवस्थापनका लागि महानगर–प्रसूति गृहबीच सम्झौता, प्लान्ट निर्माणमा दुई करोड विनियोजन
काठमाडौँ । काठमाडौँ महानगरपालिका र परोपकार प्रसूति तथा स्त्रीरोग अस्पताल बीच स्वास्थ्यजन्य फोहोर व्यवस्थापनका लागि प्लान्ट निर्माण गर्न अनुदानसम्बन्धी सम्झौता भएको छ।
बिहीबार काठमाडौंमा आयोजित कार्यक्रममा महानगर र अस्पतालबिच समझदारीपत्र (एमओयू) मा हस्ताक्षर गरिएको हो। सम्झौताअनुसार प्रसूति तथा स्त्रीरोग अस्पतालले महानगरअन्तर्गतका स्वास्थ्य प्रवर्द्धन केन्द्रहरूबाट निस्कने स्वास्थ्यजन्य फोहोर व्यवस्थापन गर्न आवश्यक प्लान्ट निर्माण गर्नेछ।
चालु आर्थिक वर्षको स्वीकृत बजेटअनुसार उक्त प्लान्ट निर्माणका लागि महानगरले दुई करोड रुपैयाँ विनियोजन गरेको जनाएको छ।
एमओयू कार्यक्रममा बोल्दै महानगरकी कार्यवाहक प्रमुख सुनिता डंगोल ले स्वास्थ्य प्रवर्द्धन केन्द्र विस्तारसँगै स्वास्थ्यजन्य फोहोर व्यवस्थापन चुनौतीपूर्ण बन्दै गएको बताइन् । उनका अनुसार महानगरभित्र खाली ठाउँको अभावका कारण फोहोर व्यवस्थापनमा थप समस्या उत्पन्न हुँदै आएको छ।
उनले महानगरका प्रत्येक वडामा स्थापना गरिएका स्वास्थ्य प्रवर्धन केन्द्रबाट निस्कने फोहोर संवेदनशील र स्वास्थ्यका दृष्टिले जोखिमपूर्ण हुने भएकाले यसको व्यवस्थित व्यवस्थापन आवश्यक रहेको उल्लेख गरिन्। यसअघि विभिन्न अस्पतालसँग छलफल भए पनि ठोस निष्कर्ष ननिस्किएको अवस्थामा प्रसूति गृहसँगको यो सम्झौता महत्वपूर्ण उपलब्धि भएको उनको भनाइ थियो।
यस सम्झौतापछि प्रसूति गृह र महानगरका स्वास्थ्य प्रवर्द्धन केन्द्रबाट उत्पादन हुने स्वास्थ्यजन्य फोहोर एकै स्थानमा प्रभावकारी रूपमा व्यवस्थापन हुने विश्वास गरिएको छ।
कार्यवाहक प्रमुख डंगोलले प्लान्ट निर्माण कार्य तत्काल सुरु गरी निर्धारित समयमै सञ्चालनमा ल्याउन अस्पताल व्यवस्थापनलाई आग्रह गरिन्।
प्रतिक्रिया दिनुहोस्