बिमा प्राधिकरणको अध्यक्ष पदका लागि आवेदन खुला

काठमाडौँ । नेपाल बिमा प्राधिकरणको सञ्चालक समितिको अध्यक्ष पद पदपूर्तिका लागि अर्थ मन्त्रालयले आवेदन आह्वान गरेको छ । मन्त्रालयले आज सूचना प्रकाशित गर्दै खुला प्रतिस्पर्धामार्फत उक्त पद पूर्ति गर्न इच्छुक नेपाली नागरिकलाई आवेदन दिन आग्रह गरेको हो ।

सूचना अनुसार बिमा, मौद्रिक, बैंकिङ, व्यवस्थापन, वाणिज्यशास्त्र, जनप्रशासन, तथ्याङ्कशास्त्र, गणित, अर्थशास्त्र वा कानून विषयमा कम्तीमा स्नातकोत्तर उपाधि प्राप्त गरी सम्बन्धित क्षेत्रमा पाँच वर्षभन्दा बढी उच्च व्यवस्थापकीय अनुभव हासिल गरेको नेपाली नागरिकले मात्र आवेदन दिन सक्नेछन् । साथै, आवेदक उच्च नैतिक चरित्र भएको र प्रचलित कानुन बमोजिम अयोग्य नभएको हुनुपर्नेछ । उमेर ३० वर्ष पूरा भई ६५ वर्ष ननाघेको व्यक्ति मात्र योग्य मानिने सूचना उल्लेख छ ।

इच्छुकले सूचना प्रकाशित भएको मितिले सात दिनभित्र कार्यालय समयमा सिंहदरबारस्थित अर्थ मन्त्रालय, वित्तीय क्षेत्र व्यवस्थापन तथा संस्थान समन्वय महाशाखामा गोप्य खामवन्दी आवेदन पेस गर्नुपर्नेछ । आवेदन दिन इच्छुकले पासपोर्ट साइजको फोटोसहित आवश्यक कागजात, विवरण र चार प्रति व्यावसायिक कार्ययोजना समेत बुझाउनु पर्नेछ ।

आवेदन दस्तुरका लागि राष्ट्रिय वाणिज्य बैंक सिंहदरबार शाखामा रु. ७५०० राजस्व खातामा जम्मा गरी भौचर संलग्न गर्नु पर्नेछ । अध्यक्षले पाउने मासिक पारिश्रमिक, सुविधा तथा सेवाका अन्य शर्त प्रचलित व्यवस्था अनुसार हुने मन्त्रालयले जनाएको छ ।

आवेदन प्रक्रिया, योग्यता र कार्यविधिसम्बन्धी विस्तृत विवरण अर्थ मन्त्रालयको वेबसाइट (www.mof.gov.np) मा प्रकाशित गरिएको छ । मन्त्रालयले पेश गरिएका आवेदन आवश्यकतानुसार कुनै कारण देखाई वा नदेखाई अस्वीकृत गर्न सक्ने जनाएको छ ।