काठमाडाैँ । मनहरी गाउँपालिका वडा नम्बर१ का वडाध्यक्ष शिवप्रसाद खनालले ५२ वर्षको उमेरमा औपचारिक उच्च शिक्षा यात्रा सुरू गरेका छन् ।
हेटौंडा उपमहानगरपालिका वडा नम्बर १९ बस्तिपुरस्थित निर्मल बहुमुखी क्याम्पसमा उनले स्नातक तह (ब्याचलर) पहिलो वर्ष समाजशास्त्र र स्वास्थ्य विषयमा अध्ययन गरिरहेका छन्।
दोश्रो कार्यकालका वडाध्यक्ष खनालले जनप्रतिनिधिको जिम्मेवारी सम्हाल्दा पनि औपचारिक अध्ययनमा कमी भएको अनुभवले मनमा खालीपन महसुस हुने गरेको बताए । गाउँमा हुने कार्यक्रमहरूमा शिक्षित व्यक्तिहरूको प्रभाव देख्दा आफू पनि त्यस्तै बन्ने चाहना बलियो हुँदै गएको उनको भनाइ छ।
विगतमा विदेश जाने सपना बोकेर पाँचपटक पासपोर्ट बनाए पनि अवसर नमिलेपछि खनालले बस बेच्नेदेखि पसल र कुखुरा पालनसम्मका काम गरे । तर ऋणको चक्रव्यूहबाट उम्किन कठिन भए पनि ती चुनौतीहरूले उनलाई कमजोर बनाइएन। २०७४ सालमा पहिलोपटक वडाध्यक्षमा निर्वाचित हुनु अघि उनको प्रमुख चाहना एउटा विद्यालयको अध्यक्ष बन्ने थियो। सोही सपना साकार गर्दै उनले श्री बाल जीवन ज्योति विद्यालय, मकरीको अध्यक्षको जिम्मेवारी पनि समाले ।
उक्त विद्यालयमा लगाइएको सप्ताहपूजाबाट संकलित रकमले कक्षा १२ सम्मको पढाइ सुरु गर्ने निर्णय उनकै पहलमा भएको हो, जसले गाउँमै उच्च शिक्षाको ढोका खोलेको छ। हाल सो विद्यालयको नयाँ भवन बनेको छ र स्थानीय विद्यार्थीहरू सहजै उच्च माध्यमिक शिक्षा हासिल गर्न पाएका छन्।
वि.सं.२०५२ मा एसएलसी उत्तीर्ण गरेका खनाल २७ वर्षपछि पुनः कक्षा ११ मा भर्ना भई २०८१ सालमा २.६ जीपीएसहित कक्षा १२ उत्तीर्ण गर्न सफल भए । त्यसै आत्मविश्वासले अहिले उनलाई स्नातक तहको अध्ययनमा अघि बढाएको हो।
सामाजिक जिम्मेवारीसँगै समय व्यवस्थापन गरेर नियमित रूपमा क्याम्पसमा पढाइमा संलग्न रहेका खनाल शिक्षा प्रतिको लगनशीलता र निरन्तर सिक्ने जाँगरका कारण स्थानीय समुदायका लागि प्रेरणादायी बनेका छन्।
प्रतिक्रिया दिनुहोस्