जडिबुटीदेखि पेप्सीकोलासम्मको सडक सीमाभित्र रहेका अनधिकृत संरचना हटाउन निर्देशन

काठमाडौँ । जडिबुटी चोकदेखि पेप्सीकोला चोकसम्मको अरनिको राजमार्ग क्षेत्रमा सडक सीमाभित्र रहेका अनधिकृत संरचना हटाउन काठमाडौँ महानगरपालिका र सडक विभागले संयुक्त सूचना प्रकाशित गरेका छन्।

“२०८२ साल वैशाख १० गते संयुक्त रूपमा जडिबुटीदेखि पेप्सीकोला चोकसम्म सडकको केन्द्र रेखाबाट दायाँबायाँ १५-१५ मिटर क्षेत्रको सीमाङ्कन र चिनो लगाइएको छ,” सूचनामा भनिएको छ ।

यस क्षेत्रभित्र सार्वजनिक सडक ऐन, २०३१ को दफा १९ को अवज्ञा गर्दै नक्सा पास नगरी वा नक्सा पास विपरीत बनाइएका सबै संरचनाहरू हटाउन सूचना मार्फत आग्रह गरिएको छ।

तोकिएको ३५ दिनको अवधि (सूचना प्रकाशित भएको मितिबाट गणना गरिने) भित्र संरचना हटाइ नसकिएमा सार्वजनिक सडक ऐन, २०३१, स्थानीय सरकार सञ्चालन ऐन, २०७४ तथा भवन निर्माणसम्बन्धी मापदण्ड र कार्यविधिअनुसार कारबाही अघि बढाइने सूचनामा उल्लेख छ।