काठमाडौँ । चीनका राष्ट्रपति सी चिनफिडसँग भएको सौहार्दपूर्ण तथा द्विपक्षीय भेटवार्तामा नेपाल–चीन सम्बन्धका विविध पक्षमा छलफल भएको छ ।
दुबै देशका नेताहरूले आपसी मित्रता र सहकार्यलाई थप मजबुत बनाउन विभिन्न संयन्त्रहरू सक्रिय रूपमा अघि बढ्ने समझदारी गरेका छन् ।
भेटका क्रममा प्रधानमन्त्री केपी शर्मा ओलीले नेपाली भूमि लिपुलेकलाई व्यापारिक मार्ग बनाउने विषयमा चीन र भारतबिच भएको सहमतिप्रति स्पष्ट आपत्ति जनाउनुभएको परराष्ट्र मन्त्रालयका सचिव अमृतबहादुर राईले जानकारी दिए ।
उनका अनुसार प्रधानमन्त्री ओलीले सन् १८१६ को सुगौली सन्धिबमोजिम महाकाली नदीको पूर्वका सम्पूर्ण भूभाग सार्वभौम मुलुक नेपालकै भएको प्रस्ट पारेका छन् ।
यस सन्दर्भमा नेपालले चीनबाट सहयोगको अपेक्षा गरेको उल्लेख गर्दै सचिव राईले चीनले नेपालका जायज चिन्तामा सकारात्मक साथ दिने विश्वास लिइएको बताए ।
प्रतिक्रिया दिनुहोस्